Íslandsbanki hefur sagt upp 16 starfsmönnum. Uppsagnirnar munu vera liður í hagræðingaraðgerðum bankans til að draga úr kostnaði, þrátt fyrir að 2,6 milljarða hagnað á fyrsta ársfjórðungi og lægra kostnaðarhlutfall.

„Bankinn er að hagræða til að draga úr kostnaði, en kostnaðarhlutfall samstæðu var 62,6 prósent eftir fyrsta ársfjórðung,“ segir Edda Hermannsdóttir, samskipta- og markaðsstjóri Íslandsbanka í svari til blaðamanns.

„Við erum að fækka bæði í útibúum og höfuðstöðvum en við tilkynntum í dag breytingu á þjónustustigi í útibúum okkar á Granda og Höfða. Það er í takt við þá þróun þar sem heimsóknum í útibú er að fækka verulega.“

Blaðamaður hefði tekið eftir því að auglýsingar bankans fyrir maraþon Íslandsbanka, eru þær sömu og notaðar voru fyrir ári síðan. Skyldi það einnig vera hluti af hagræðingaraðgerðum?

„Það lá fyrir á síðasta ári, þegar ráðist var í stóra herferð með fjölda íslenskra leikara sem gáfu vinnu sína til styrktar góðum málefnum, að herferðin yrði notuð í tvö ár.“

Eitthvað virðist Íslandsbanki þó vera að gera rétt þar sem þrátt fyrir háan kostnað eftir fyrsta ársfjórðung náði bankinn samtímis að hagnast um 2,6 milljarða og lækka kostnaðarhlutfallið um 7,2 prósent.  Í tilkynningu Íslandsbanka til Kauphallar fyrir skömmu sagði að lausafjárstaða bankans væri sterk bæði í íslenskum krónum sem og erlendum gjaldmiðlum, vel umfram kröfur eftirlitsaðila og innri viðmið. Í tilkynningunni er haft eftir Birnu Einarsdóttur, bankastjóra:

„Framhaldið er spennandi fyrir okkur í Íslandsbanka þar sem við ætlum okkur að vera hreyfiafl til góðra verka og hafa jákvæð og uppbyggileg samfélagsáhrif en jafnframt halda áfram að veita viðskiptavinum okkar bestu bankaþjónustu á Íslandi.