Valur vann sinn fyrsta deildarleik í Pepsi Max-deild karla í gær er liðið vann Fylki 1-0 á útivelli.
Aðeins eitt mark var skorað í leiknum en það gerði Orri Sigurður Ómarsson fyrir þá rauðu snemma í fyrri hálfleik.
Gary Martin var ekki í leikmannahópi Vals í leiknum en honum var tjáð að hann gæti fundið sér nýtt lið á dögunum.
Rætt var um mál Gary í hlaðvarpsþættinum Dr. Football í gær og var greint frá því að leikmenn væru ósáttir við hegðun framherjans sem samdi fyrir tímabilið.
Talað var um að leikmenn á borð við Hannes Þór Halldórsson, Birkir Már Sævarsson og Bjarni Ólafur Eiríksson væru ósáttir við framkomu Gary.
Hannes var spurður út í málið í samtali við Morgunblaðið í gær eftir sigur liðsins á Fylki á Wurth vellinum.
,,Það eina sem ég vil segja um þetta mál er þessi umræða þar sem mitt nafn, Birkis Más og Bjarna hefur verið dregið inn í þetta er algjör þvæla og uppspuni frá rótum. Annað hef ég ekki um málið að segja,“ sagði Hannes við Guðmund Hilmarsson.
Gary fékk ekki að mæta á æfingu hjá Val fyrir leikinn í gær og er framtíð hans því í mikilli óvissu.
Ólafur Jóhannesson, þjálfari Vals, íhugar að leyfa Gary að mæta á ný en það verður að koma í ljós á næstu dögum. Félagaskiptaglugginn á Íslandi er nú lokaður.
