Rokkgoðsögnin Chuck Berry er látinn, níræður að aldri. Berry var einn vinsælasti og áhrifamesti tónlistarmaður tuttugustu aldarinnar og er talinn einn af frumkvöðlum rokktónlistarinnar. Þá hefur hann haft mikil áhrif á listsköpun annarra tónlistarmanna í gegnum tíðina, á borð við Elvis Presley og Angus Young.
Hann fæddist í borginni St. Louis í Missouri árið 1926 og byrjaði að spreyta sig á tónlistarsviðinu á unglingsárum. Ferill hans hófst þó fyrir alvöru þegar hann var 24 ára gamall. Hann skrifaði undir sinn fyrsta útgáfusamning árið 1955 og í kjölfarið kom út fyrsti „hittarinn“ en það var lagið Maybellene.
Berry var í gegnum tíðina þekktur fyrir að blanda saman ólíkum stílum í tónlistarsköpun sinni líkt og gospeli, blús, og kántrý-tónlist og þá þótti sviðsframkoma hans einkar heillandi. Hér fyrir neðan má hlusta á nokkur af vinsælustu lögum goðsagnarinnar.