Fjórða ganga Píeta samtakanna „Úr Myrkrinu í Ljósið“ eða „Darkness Into Light“ fer fram næsta laugardag, 11. maí, en þar verður gengin 5 kílómetra leið úr næturmyrkri inn í dagrenningu, úr myrkri í ljós.

Gangan er í minningu þeirra sem látist hafa í sjálfsvígi og til að efla von þeirra sem eiga um sárt að binda vegna vanlíðunar, sjálfsvígshugsana og sjálfsskaða. Gengið er til styrktar Píeta samtökunum sem bjóða nú ókeypis úrræði fyrir fólk í sjálfsvígshugleiðingum, við sjálfsskaða og veita aðstoð fyrir aðstandendur og þá sem misst hafa ástvini í sjálfsvígi.

Píeta samtökin voru stofnuð á Íslandi árið 2016 en halda upp á árs starfsafmæli nú í ár. Þörfin á Píeta samtökunum hefur sannað sig á þessu ári en sem dæmi má nefna að 19 meðferðarviðtöl voru veitt í apríl í fyrra en 158 í apríl á þessu ári.

Gangan fer fram á fjórum stöðum á landinu: Reykjavík, Akureyri, Ísafirði og Seyðisfirði, sem og í fjölmörgum öðrum löndum og er reiknað með að yfir 400 þúsund manns gangi úr myrkri inn í birtu á sama tíma.

Gangan er aðfararnótt 11.maí og hér í Reykjavík hefst gangan kl. 3 um nótt við húsnæði KFUM og KFUK við Holtaveg í Laugardal. Gangan er stór þáttur í vitundarvakningu Íslendinga, falleg stund þar sem minningar og samhugur sameinast. Jói P og Króli og Þráinn úr Skálmöld skemmta göngufólki.

Hægt er að skrá sig í gönguna og fá nánari upplýsingar á vefsíðu Darkness Into Light og á viðburðinum á Facebook.

Myndirnar tók Hafliði Breiðfjörð í göngunni í Reykjavík í fyrra, fleiri myndir má sjá hér.

Fólk með sjálfsvígshugsanir er minnt á Hjálparsíma Rauða krossins, 1717, og netspjallið. Þjálfaðir og reynslumiklir sjálfboðaliðar á öllum aldri svara þeim símtölum og spjöllum sem berast. Fullum trúnaði er heitið, númerið er ókeypis og opið allan sólarhringinn.
Nánari upplýsingar hér: https://www.raudikrossinn.is/hvad-gerum-vid/hjalparsiminn-1717
Píeta samtökin bjóða einnig upp á þjónustu í síma 552-2218 fyrir fólk í sjálfsvígshættu og með sjálfsskaðahegðun.