The Times greinir frá því í dag að Paul Pogba, leikmaður Manchester United, verði í liði ársins á Englandi sem verður birt í dag.

Það er ákvörðun sem kemur mörgum á óvart þó að Pogba hafi staðið sig nokkuð vel eftir áramót.

Samkvæmt heimildum Times er Pogba eini leikmaðurinn sem kemst í liðið sem spilar ekki með Manchester City eða Liverpool.

Liverpool og City hafa verið bestu lið tímabilsins og eru í harðri baráttu um Englandsmeistaratitilinn.

Miðað við þessar fregnir fær Pogba þó pláss á miðjunni en hann hefur áður þrisvar verið valinn í lið ársins á Ítalíu er hann lék með Juventus.

Pogba hefur spilað 44 leiki fyrir United á þessari leiktíð og hefur skorað í þeim 16 mörk.