DV greindi í gær frá óskemmtilegri reynslu þingmannsins Guðmunds Andra Thorssonar í Hagkaup þar sem maður hélt reiðilestur yfir honum og kallaði hann samfylkingardrullu. Á Facebook lýsti hann því að hann hafi þarna mætti netbræðinni í raunveruleikanum og varð mikið um. Í dag greinir Guðmundur frá því á Facebook að sú athygli sem frásögn hans fékk hafi komið honum á óvart. Hann bendir á að markmið færslunnar hafi ekki verið að gera sjálfan sig af fórnarlambi heldur að vekja athygli á þeim manni sem hann hitti fyrir. Virkan í athugasemdum í persónu.
„Í gær sagði ég frá kyndugri reynslu í búðarferð en áttaði mig satt að segja ekki á því að sú litla lýsing myndi vekja athygli umfram aðrar eða fara um þræði netsins eins og raunin varð. Ekki víst að ég hefði fært þetta til fésbókar ef ég hefði áttað mig á því enda hef ég aldrei viljað útmála mig sem fórnarlamb eins eða neins, eins og mér virðist að einhverjir vilji skilja þessa færslu. Alls ekki. Ég er sæll og glaður að vanda.“
Guðmundur bendir á að margir hafi lent í mun verra aðkasti en hann lenti í í Hagkaup. Atvikið hafi átt sér stað í afar hversdagslegum kringumstæðum, verslunarferð í Hagkaup.
„Þetta var lýsing á ógnandi framkomu. Færslan snerist með öðrum orðum ekki um mig að öðru leyti en því að lýsa undrun minni yfir að hitta augliti til auglits sjálfan „Virkan í athugasemdum“ sem leit út eins og hver annar maður að versla. Færslan snerist um hann.“
Guðmundur biður fólki því að hugsa ekki um hann sjálfan í frásögninni heldur þau mörk sem við setjum, eða ættum að setja okkur í samskiptum við aðra. Jafnvel þó samskiptin séu við opinberar persónur eins og þingmenn.
„Hún snerist um það andrúmsloft reiði og öfga sem stöðugt er magnað af tilteknum öflum – pólaríseringuna – og birtist meðal annars á svona hátt. Og getur birst á svo miklu miklu verri hátt. Og ég bið fólk að hugsa um sig sjálft: er verið að grilla í mér? Er verið að espa mig upp? Er verið að ala á óþarfa áhyggjum hjá mér?“
