Borið hefur á því að nýir, samanbrjótanlegir símar frá Samsung, Galaxy Fold, bili skömmu eftir að byrjað er að nota þá. Blaðamenn sem sérhæfa sig í fréttum af tæknimálum hafa fengið eintök af símum til prófunar. Svo virðist vera sem Samsung þurfi að fínstilla eitthvað hjá sér áður en síminn kemur á markað.
Talsverð eftirvænting ríkir vegna nýju símanna sem kosta um tvö þúsund Bandaríkjadali í Bandaríkjunum. Í frétt AP segir að nokkrir þeirra síma sem verið hafa í prófun hafi bilað eftir aðeins tveggja daga notkun. Bilunin var samskonar; skjárinn byrjaði að flökta áður en hann varð alveg svartur.
Haft er eftir tveimur blaðamönnum að þeir hafi fjarlægt þunna filmu af skjánum, filmu sem þeir töldu að ætti að fjarlægja. Þegar þeir gerðu það hafi bilunin gert vart við sig. En aðrir blaðamenn, sem ekki fjarlægðu filmuna, urðu samt sem áður varir við bilunina. Þessi tiltekna filma á að vera á símunum.
Todd Haselton, fréttamaður CNBC, segir að síminn sem hann fékk hafi verið algjörlega ónothæfur innan tveggja daga. Samsung hefur fullyrt að það eigi að vera hægt að opna og loka símanum 200 þúsund sinnum, 100 sinnum á dag í fimm ár, áður en búnaðurinn byrjar að gefa sig.
Samsung hyggst setja símann á markað þann 26. apríl næstkomandi en undanfarnar vikur hefur neytendum boðist að forpanta þá. Óvíst er hvort þessi tíðindi hafi einhver áform á útgáfu símans eftir rúma viku. Síminn er nokkuð einstakur. Þegar hann er lokaður er hann eins og hver annar snjallsími en þegar hann er opnaður má líkja honum við litla spjaldtölvu. Nýr sími mun kosta 1.980 Bandaríkjadali, eða vel yfir 200 þúsund krónur.