Kidda Svarfdal, ritstjóri Hún.is, birtir fyrr í dag frétt þar sem Íslendingar eru varaðir við „andardrætti djöfulsins“. Samkvæmt henni lentu íslenskir feðgar í þessu efni á dögunum á Tenerife en að hennar sögn getur þetta efni látið menn haga sér eins og uppvakninga.
„Það eru til sögur af fólki sem lendir í því að þessu efni er blásið í andlit þess eða þeim er rétt nafnspjald sem er búið að dýfa í efnið. Það veldur því að fórnarlambið fer í einhverskonar „zombie“ ástand, þar sem það getur ekki stjórnað gjörðum sínum, líffærum þeirra stolið, bankareikningar þeirra tæmdir, þeim nauðgað og hótelherbergi tæmd. Í of stórum skömmtum er þetta banvænt!,” segir í greininni.
Kidda segir svo Íslendinga hafa lent í þessu efni. „Þeir vildu ekki tjá sig um þetta við okkur en staðfestu að þeir hefðu orðið fyrir hryllilegri reynslu,“ segir í greininni.
„Andardráttur djöfulsins“ heitir réttu nafni hyoscine eða scopolamine og er vel þekkt efni. Það er mikið notað sem lyf við ógleði eftir aðgerð og ferðaveiki líkt og bílveiki eða sjóveiki.
Aukaverkanir sem fylgja hysoscine eru: þreyta, óljós sjón og munnþurrkur. Sérfræðingar telja ólíklegt að efnið geti látið fólk missa sjálfstjórn og fara í „zombie“ ástandið sem Kidda skrifar um. Þeir segja ansi hæpið að efnið eigi stóran þátt í glæpum líkt og gjarnan er fullyrt.
Þar að auki er ekki auðvelt að nálgast hysoscine þar sem lítill markaður er fyrir því á götunni og lyfjafyrirtæki ólíkleg að veita almenningi það, segja sérfræðingar.
Efnið getur þó gert einstaklinga dasaða ef það er gefið í mjög miklu magni. En samkvæmt sögunum sem eru að berast frá útlöndum er efninu blásið framan í fórnarlömbin, en ólíklegt þykir að það hafi hættuleg áhrif.
