Tækniskólinn og Samtök iðnaðarins hafa, í samstarfi við alla iðn- og verkmenntaskóla á landinu, hrundið af stað átaki sem hefur það markmið að brjóta niður úreltar hugmyndir þess efnis að ákveðin störf henti aðeins konum á meðan önnur henti körlum.

Átakið, sem ber yfirskriftina #kvennastarf, vísar til „mýtu sem flestir landsmenn kannast við, mýtunnar um að eðlilegt sé að starfsgreinar flokkist í kvennastörf og karlastörf,“ segir í tilkynningu vegna átaksins.

„Velt er upp spurningunni; hvaða störf eru kvennastörf? Svarið er að öll störf eru kvennastörf. Hefðbundin verkaskipting kynjanna er orðin úrelt og á ekki lengur við í nútímasamfélagi. Konur eiga að geta starfað við það sem þeim sýnist og það sama gildir um karlmenn.“

Í tilkynningunni er bent á að iðn- og verkgreinar séu enn karllægustu starfsgreinar atvinnulífsins og þar ríki mikil skortur á fagmenntuðu fólki. „Ef rúmlega helmingur þjóðarinnar, konur, útilokar verk-, tækni- og iðngreinar vegna úreltra staðalímynda þá er það kannski ekki að undra.“

Átakið hófst á birtingu ljósmynda, sem prýða nú mörg strætisvagnaskýli á höfuðborgarsvæðinu. Myndirnar sýna stelpur sem eru nemendur í viðkomandi iðngrein og er ætlað að varpa ljósi á glæsilegar fyrirmyndir sem stunda nám eða vinna við þessi störf.