Sprengja sprakk í miðborg Malmö í Svíþjóð um klukkan tvö í nótt. Ung stúlka, sem var sofandi í húsi við Amiralsgatan, slasaðist í sprengingunni og var flutt á sjúkrahús. Töluverðar eignaskemmdir urðu á húsum í nágrenninu.

Aftonbladet hefur eftir nágranna að hann „hafi aldrei heyrt svona hátt hljóð“ eins og þegar sprengjan sprakk.

Lögreglunni barst fjöldi tilkynninga um sprenginguna upp úr klukkan tvö í nótt. Lögreglan girti stórt svæði af og sérfræðingar hennar hafa unnið að vettvangsrannsókn í alla nótt.

Talsmaður lögreglunnar sagði að stúlkan hafi ekki slasast lífshættulega. Gluggi, fyrir ofan rúm hennar, brotnaði yfir hana í sprengingunni. Enginn hefur verið handtekinn vegna málsins.