Þrjú erlend skip eru nú við veiðar í íslenskri fiskveiðilögsögu austur af landinu; tvö norsk og eitt færeyskt. Skipin eru við loðnuveiðar en upphaf vertíðarinnar er nokkuð óvenjulegt þar sem engin íslensk uppsjávarskip eru á miðunum vegna verkfalls sjómanna. Erlendu skipin eru því ein um hituna, að sinni að minnsta kosti. Norðmenn mega veiða um sjötíu prósent heildarkvótans, rúm 40 þúsund af tonn af 57 þúsund tonnum.
Í tilkynningu sem Landhelgisgæslan sendi frá sér á fimmtudag kom fram að varðskipið Týr væri á leið norður fyrir landið með stefnu á loðnumiðin, en þar sinnir gæslan venjubundnu eftirliti og tryggir að veiðarnar gangi rétt fyrir sig.