Íslendingar hafa lengi verið duglegir við sundiðkun enda er landið þekkt um allan heim fyrir góðar, hreinlegar og upphitaðar sundlaugar. Margir af þeim Íslendingum sem flutt hafa til útlanda hafa meðal annars greint frá því að sundlaugar landsins séu eitt af því sem þeir sakni hvað mest eftir þegar út í heim er komið. Nú fer senn að hlýna í veðri og þá fara enn fleiri að sækja sundstaði landsins og ákvað DV því að kanna verð hjá nokkrum vinsælum sundlaugum. Ef skoðaður er vefurinn sundlaugar.is má sjá að ódýrast er fyrir fullorðna að fara í sund í Hafnarfirði en aftur á móti er frekar dýrt að leigja sér sundföt og handklæði í bæjarfélaginu.
Bæði á Akureyri og í Borgarnesi þurfa börn og aldraðir að borga fyrir aðgang í sundlaugina en í Garðabænum og á Álftanesi þarf sami hópur fólks ekki að greiða neinn aðgangseyri. Þá virðist sundlaugin í Húsafelli vera langdýrust af öllum þeim sundlaugum sem DV tók fyrir. Það ber að taka fram að fleiri sundlaugarstaði er hægt að skoða á heimasíðunni en þá sem blaðamaður skoðaði.