Frásögn Ragnhildar Stefánsdóttur af grænlenskri konu sem varð fyrir fordómum hér á landi hefur vakið mikla athygli. Ragnhildur greindi frá því að konan hefði orðið fyrir aðdróttunum vegna þjóðernis og tengdi það við að landi hennar situr í fangelsi, grunaður um að hafa banað Birnu Brjánsdóttur.

Grænlenska konan trúði Ragnhildi fyrir því að í Kringlunni hefðu verið gerð hróp að henni og vildi hún komast sem fyrst heim til Grænlands. Ragnhildur segir:

„Ætlar fólk virkilega að haga sér svona? Hversu miklir smáborgarar geta sumir verið? Ég er miður mín eftir að hitta þessa konu, skil fullkomlega reiði fólks gagnvart gerandanum en við skulum ekki fordæma heila þjóð.“

Áður hafa fjölmiðlar greint frá því að skipverji hafði orðið fyrir aðkasti hér á landi og verið vísað út úr verslun af tveimur viðskiptavinum.

Brjánn Guðjónsson, faðir Birnu Brjánsdóttur deildi skrifum Ragnhildar og sagði:

„Ég fordæmi þá hegðun að dæma heila þjóð vegna gjörða eins manns. Grænlendingar eru vinir okkar og við eigum að efla þann vinskap heldur en hitt.“