Hörður Snævar Jónsson skrifar frá Andorra:

Fyrsti sigur Erik Hamren með íslenska landsliðið er í hús, liðið vann 0-2 sigur á Andorra í kvöld. Um var að ræða fyrstu umferð í undankeppni EM. Sigurinn því sögulegur fyrir Hamren, í níundu tilraun tókst að klára leik.

Íslenska landsliðið hafði ekki unnið leik á alþjóðlegum leikdegi í meira en ár. Sigurinn er því afar ljúfur.

Leikurinn fór fram á fremur lélegu gervigrasi í Andorra og það hafði áhrif á spilamennsku liðsins, gestirnir nýttu hvert tækifæri í að tefja og sparka í leikmenn Íslands.

Birkir Bjarnason skoraði fyrra mark leiksins í fyrri hálfleik, eftir hornspyrnu kom Ragnar Sigurðsson boltanum á Birki sem kláraði vel. Viðar Örn Kjaratnsson bætti svo við öðru markinu.

Plús og mínus er hér að neðan.

Plús:

Viðar Örn Kjartansson kom inn með læti, skoraði geggjað mark og bað svo aðra um að þegja með fagni sínu. Ætla má að hann sé að senda þau skilaboð á Kjartan Henry Finnbogason.

Það var gaman að sjá snillina sem Jóhann Berg Guðmundsson og Gylfi Þór Sigurðsson gátu kokkað upp saman. Þeir skilja hvorn annan vel, gæðaleikmenn.

Aron Einar Gunnarsson, minnti helst á kónginn, Heimi Guðjónsson í sinni nálgun í leiknum. Stýrði liðinu eins og herforingi úr miðju hringnum, einstakur leiðtogi. Nærvera hans innan vallar er mögnuð.

Það allra mikilvægasta var að ná í þrjú stig, fyrir strákana er þungu fargi af þeim létt. Erik Hamren getur líka andað léttar, fyrsta skrefið í átt að EM 2020 var klárað.

Sigurinn gefur liðinu færi á að fara til Frakklands og anda rólega, sigurinn sem allir settu kröfur á eru í hús. Jafntefli eða sigur í Frakklandi væru bónus.

Mínus:

Gegn slöku liði eins og Andorra myndi maður vilja sjá íslenska liðið slátra leiknum fyrr, það hefði gefið betra andrými fyrir leikinn gegn Frökkum.

Það vantaði meiri ógn frá hægri vængnum og fremstu víglínu í leiknum til að ganga frá verkefninu.

Það er eitt að spila á gervigrasi en það er annað að spila á svona lélegu gervigrasi eins og Andorra er með. UEFA verður að gera kröfu á hæsta gæðaflokk af svona grasi, ef það á að leyfa það í svona keppni.