Hörður Snævar Jónsson skrifar frá Andorra:

Aron Einar Gunnarsson, ræddi við fréttamenn fyrir leikinn gegn Andorra í undankeppni EM á morgun. Aron ræddi við fréttamenn á leikvanginum í Andorra.

Vikan hefur verið fróðleg fyrir Aron sem í upphafi vikunnar, skrifaði undir hjá Al-Arabi í Katar. Þar er Heimir Hallgrímsson, þjálfari liðsins.

,,Samningurinn við Cardiff er á enda í sumar og við ákváðum að fara til Katar. Þar er Heimir og ég er spenntur fyrir þessari áskorun,“ sagði Aron Einar þegar hann var spurður um skiptin.

,,Heimir er að byggja upp lið, félag sem var stórt og er aftur á uppleið. Núna er tími fyrir hann að koma því í gang, fá stuðningsmenn á völlinn og svona. Ég er spenntur, fótboltinn er að verða betri þarna enda er HM 2020 þarna.“

Aron var spurður að því hvort hann væri að fara til Katar til að lengja ferill sinn með landsliðinu. ,,Klárlega, það er ekki jafn mikið álag og hraði. Ég hef verið níu ár í næst efstu deild Englands og tvö í úrvalsdeildinni. Þau hafa tekið sinn toll, pressa og hraði og mikið álag. Þetta er líka gert með það í huga, lengja ferilinn um nokkur ár og vonandi nýtist það landsliðinu.“

Aron Einar fer sem stjarna í Katar og þær fá iðulega vel greitt, er þetta besti samningur hans á ferlinum?

,,Ég ætla ekki að tala um peninga, þegar kemur að þessu. Ég er spenntur fyrir nýrri áskorun, öðruvísi land og kúltúr. Prófa eitthvað nýtt. Það heillaði.“