Hörður Snævar Jónsson skrifar frá Peralada á Spáni:

Albert Guðmundsson, leikmaður AZ Alkmaar er mættur í verkefnið með íslenska landsliðinu og er klár í slaginn. Ísland leikur við Andorra á föstudag og Frakkland á mánudag, um er að ræða leiki í undankeppni EM.

Undankeppni EM er að fara af stað en Albert hefur verið í holu hjá félagsliði sínu, í Hollandi. Hann ræddi það við RÚV.

Albert gekk í raðir AZ síðasta sumar og áttu flestir von á því að hann fengi stórt hlutverk, hann þarf hins vegar að vera þolinmóður.

„Ég hef ekki spilað eins mikið og ég hafði búist við. Ég þarf að koma mér aftur inn í liðið. Það mun taka tíma og ég er að reyna að aðlagast umhverfinu og stundum tekur það lengri tíma en maður vonar og ætlar,“ sagði Albert við RÚV.

Albert segir það gott að koma til móts við landsliðið til að endurræsa hausinn.

„Það er alltaf gott og heiður að komast í landsliðið og það gefur manni kannski nýtt augnablik til að endurræsa sig. Auðvitað er einbeitingin á góð úrslit með landsliðinu en ef maður hugsar dýpra þá er þetta kannski líka gott fyrir mann sjálfan. Aðeins fyrir hausinn, að kúpla sig út úr strögglinu hjá AZ að sitja á bekknum.“