Hörður Snævar Jónsson skrifar frá Peralada á Spáni

,,Við erum mjög spenntir, spenntir að byrja þessa undankeppni,“ sagði Gylfi Þór Sigurðsson, skærasta stjarna landsliðsins við fréttamenn fyrir æfingu landsliðsins á Spáni í dag.

Gylfi og félagar hans í landsliðinu undirbúa sig fyrir leik gegn Andorra á föstudag. UM er að ræða fyrsta leik liðsins í undankeppni EM, á mánudag er svo leikur við Frakkland.

Gylfi var á skotskónum í 2-0 sigri Everton á Chelsea á sunnudag, þar með var ljóst að um besta tímabil Gylfa er að ræða þegar kemur að markaskorun.

Gylfi hefur skorað tólf mörk í ensku úrvalsdeildinni sem er hans besti árangur. Þrátt fyrir það hefur Gylfi mátt þola talsverða gagnrýni, það hefur fyrst og síðast snúist um stöðuleika liðsins.

,,Þetta er búið að vera upp og niður tímabil, við spilum vel á móti Liverpool sem dæmi og í seinni hálfleik gegn Chelsea og vinnum leikinn. Síðan erum við 2-0 yfir gegn Newcastle og tuttugu mínútur eftir af leiknum, og við töpum honum. Þetta er búið að vera upp og niður í allan vetur,“ sagði Gylfi um stöðuna hjá Everton.

,,Mjög fínt fyrir mig persónulega, líður vel og búið að ganga ágætlega.“

Gylfi hefur fengið mikið traust frá Marco Silva, stjóra Everton. Flestir leikmenn liðsins eru settir á bekkinn reglulega en það er ekki staðan með Gylfa.

,,Mér líður mjög vel með þjálfarann, finn fyrir miklu trausti frá honum. Það er mjög gott að vinna með honum, allt öðruvísi að spila allt tímabilið á miðjunni.“

Viðtalið við Gylfa er í heild hér að neðan.