Í mars á síðasta ári réðust fjórir menn, á aldrinum 19 til 24 ára, á tyrkneska sendiráðið í Kaupmannahöfn og köstuðu eldsprengjum í það. Undirréttur í Kaupmannahöfn kvað upp dóm í málinu í gærmorgun og vakti hann sterk viðbrögð og miklar tilfinningar viðstaddra.

Allir mennirnir voru fundnir sekir um að hafa ráðist á sendiráðið. Þrír þeirra voru dæmdir í eins árs og níu mánaða fangelsi en sá fjórði var dæmdur í eins og hálfs árs fangelsi. Auk þess var þeim öllum vísað úr landi og mega ekki snúa aftur til Danmerkur í 12 ár.

Danska ríkisútvarpið segir að margir ættingjar mannanna hafi verið í dómsal við dómsuppkvaðninguna og hafi dómurinn vakið sterk viðbrögð. Margir hafi grátið og virst miður sín.

Mennirnir tilheyra allir samfélagi Kúrda í Kaupmannahöfn.