Mislingafaraldur herjar nú á Washington í Bandaríkjunum. Heilbrigðisyfirvöld meta stöðuna sem svo að hér sé um heilbrigðishörmungar að ræða. En samt sem áður bætist sífellt við þann hóp foreldra sem vilja ekki láta bólusetja börn sín.

Hugsanlega telja sumir að faraldrar á borð við þennan heyri sögunni til og taki hættuna því ekki alvarlega.

Lítill bær, nærri Portland í Oregon, hefur vakið sérstaka athygli bandarískra heilbrigðisyfirvalda en þar er óvenjulega hátt hlutfall foreldra sem eru mótfallnir bólusetningum. Það hafa komið fram sjónarmið í gegnum tíðina um að bólusetningar geti haft alvarlegar aukaverkanir í för með sér, þar á meðal einhverfu, en niðurstöður margra rannsókna hafa sýnt að engin tengsl eru þar á milli.

En þetta hefur ekki slegið alla út af laginu og andstöðuhópar við bólusetningar hafa heldur sótt í sig veðrið. Alþjóðaheilbrigðismálastofnunin WHO hefur sett andstöðuna við bólusetningar á topp tíu lista sinn yfir mestu hætturnar sem steðja að heilbrigði mannkyns á þessu ári.