Breski grínistinn Jimmy Carr sækir Ísland heim næstu helgi og heldur uppistand bæði á Akureyri og í Reykjavík. Félagarnir í Harmageddon á X-inu slógu á þráðinn til Jimmys í morgun og þótt ótrúlegt megi virðast var mikið rætt um mat og drykk.
Jimmy var með uppistand á Íslandi síðast árið 2015 og var hæstánægður með þá heimsókn.
„Ég held að ég hafi orðið mjög, mjög fullur síðast. Ég fór út og fékk mér nokkra drykki og fékk mér síðan nokkra drykki í viðbót. Það er mín tilfinning að það sé erfitt að verða ekki fullur á Íslandi,“ segir Jimmy í meðfylgjandi hljóðbroti og bætir við að Íslendingar hafi verið mjög vinalegir.
„Þeir leyfðu mér ekki að fara heim af djamminu alveg strax.“
Þá segir Jimmy að honum hafi verið boðinn þorramatur síðast, nánar til tekið svið og hákarl.
„Ég fékk mér ekkert af því. Ég held að þessi matur sé bara fyrir ferðamenn, til að vinsa út þá sem eru auðtrúa áður en drykkjan hefst,“ segir Jimmy og Frosti bætir við að hann myndi ekki borða þorramat þó hann fengi milljón dollara fyrir.
„Tja, fyrir milljón dollara. Þá er annað uppi á teningnum,“ segir Jimmy. „Það er fátt sem ég myndi ekki setja upp í mig fyrir milljón dollara.“
Hlusta má á viðtalið hér fyrir neðan, en það byrjar í kringum 20. mínútu: