Heitar umræður hafa sprottið upp um ketó-mataræðið inni í Facebook-hópnum Vegan Ísland, þar sem er að finna grænkera eða alla þá sem hafa áhuga á vegan mataræði. Ketó-mataræðið gengur út á að borða lágkolvetna mat og velja margir að borða mikið kjöt á mataræðinu til að fá nóg af próteini.
Sá sem hefur umræðurnar telur að ketó-mataræðinu sé stillt uppá móti vegan fæði.
„Mér finnst þetta sett upp sem einhverskonar mótsvar við veganisma. Tökum burtu siðferðislegu hliðina, og tőlum bara um heilsufarslega þáttinn. Ókei, mjög líklega virkar þetta ágætlega ef maður vill grenna sig, en að borða svona mikið magn af kjöti er alltaf óhollt, það er „common sense“.Ef maður er bara að hugsa um hollustuna. Það er allavega það sem èg held,“ skrifar hann.
Þeir sem skrifa athugasemdir við færsluna eru flestir sammála um að ketó sé alls ekki mótsvar við veganisma. Nánast allir eru þó þeirrar trúar að ketó-mataræðið sé skammtímalausn, og frekar óhollt.
„Þetta er bara trend kúr eins og Atkins hérna í den. Óheilsusamleg bóla sem mun springa. Enda búið að „debunka“ ketó sem langtímakúr. Virkar til að léttast en margir hverjir þróa með sér alls konar sjúkdóma með árunum,“ skrifar einn og annar bætir við.
„Matarkúr er skamtímalausn, sama hvað hann heitir. Þekki til fólks sem er orðið öryrkjar í dag vegna þess að það tók ketó of langt, beikon í öll mál.“
Einn meðlima hópsins tekur strangt til orða og segir ketó vera „seriously fokt kúr“, á meðan annar bendir á að ekki sé mælt með því að vera ketó lengi.
„Þetta kemur veganisma ekkert við. Þetta snýst um að koma líkamanum í ketosis. Það er hægt að vera á vegan ketó, er bara aðeins erfiðara. Það er ekki mælt með að vera lengi á ketó því líkaminn getur myndað insúlín ónæmi. Ég hef sjálf verið á svipuðu mataræði sem heitir „carb nite“ en það er eins með það að það er mjög erfitt en ekki ómögulegt að vera vegan á því.“
Svo bendir einn notandi hópsins réttilega á að ketó-mataræðið hafi verið hannað til að stjórna hormónastarfsemi flogaveikra, eins og kom fram í máli læknisins Teit Guðmundssonar fyrir nokkru.
„Það að fara á mataræði sem er hugsað til þess að aðstoða við alvarlega læknisfræðilega kvilla til þess eins að sækjast eftir aukaverkunum er í besta falli heimskulegt og það ætti hver einasti einstaklingur að sjá hvað það er klikkað, allavegana þeir sem hafa greindarvísitölu yfir stofuhita.“
Ketó-mataræðið hefur notið mikilla vinsælda uppá síðkastið, en meðal þeirra sem hafa gagnrýnt mataræðið harðlega er einkaþjálfarinn Jillian Michaels. Þá kom nýlega út svört skýrsla þar sem það var fullyrt að neysla kolvetna gætu minnkað líkur á hjartasjúkdómum og aukið lífslíkur.