Eigendur úrskurðuðu í málinu – LS Retail íhugar málsókn
Íslandsbanki mun einn leigutaka í Norðurturni við Smáralind fá heimild frá eigendum til þess að auglýsa vörumerki sitt á toppi byggingarinnar. Þetta liggur fyrir eftir ákvörðun stjórnar Nýs Norðurturns hf. Mikil óánægja er meðal annarra leigutaka í húsinu og íhuga forsvarsmenn LS Retail nú að leita réttar síns fyrir dómstólum. Þá var endanlega ákveðið að byggingin skildi kallast Norðurturninn í opinberu tali. Áður hafði Íslandsbanki stungið upp á því að heiti byggingarinnar yrði „Íslandsbankaturninn“ en sú tillaga hlaut ekki hljómgrunn.
DV hafði greint frá því í október að átök geisuðu meðal leigutaka Norðurturnsins um sýnileika fyrirtækjanna utan á húsinu. Segja má að allt hafi breyst þegar Íslandsbanki ákvað um miðjan apríl síðastliðinn að flytja höfuðstöðvar sínar í bygginguna. Áður var eingöngu stórt útibú á teikniborðinu hjá bankanum í Norðurturni.
Þegar höfuðstöðvarnar voru allt í einu undir þá sá bankinn fram á að vörumerkið þyrfti að vera afar áberandi og hefur síðan sótt það fast.
Norðurturninn er fimmtán hæða glæsihýsi í eigu Nýs Norðurturns hf. Íslandsbanki er einn af eigendum félagsins, með 22,85% hlut, og situr því beggja vegna borðsins í deilunum. Aðrir hluthafar eru Glitnir, Tryggingamiðstöðin, Lífsverk lífeyrissjóður, Bilskirnir ehf., Grænistekkur ehf. og Hjúpur ehf. (dótturfélag Byggingafélags Gylfa og Gunnars). Byggingin er samtengd Smáralind og því gerði móðurfélag Smáralindar, Reginn, samning um leigu á tveimur neðstu hæðum hússins þaðan sem innangengt er í verslunarmiðstöðina. Í lok febrúar var tilkynnt með pomp og prakt að hugbúnaðarfyrirtækin LS Retail og Annata hefðu skrifað undir leigusamninga um rými í byggingunni. LS Retail festi sér 11–15. hæð hússins og Annata leigði 10. hæð turnsins. Um miðjan apríl tilkynnti Íslandsbanki að ákveðið hefði verið að flytja höfuðstöðvar bankans í Norðurturn og myndi bankinn verða starfræktur á 3–9. hæð húsnæðisins.
Tveimur mánuðum áður hafði hugbúnaðarfyrirtækið LS Retail skrifað undir samning um að leigja þriðjung Norðurturnsins, fyrst allra fyrirtækja. Fyrirtækið þróar og markaðssetur hugbúnað úti um allan heim og því er mikilvægt að lógó fyrirtækisins og ímynd sé sterk og áberandi. „Við erum með 4.000 viðskiptavini í 120 löndum. Samstarfsaðilar okkar koma ávallt með núverandi og tilvonandi viðskiptavini í heimsókn til Íslands til þess að kynnast fyrirtækinu og öðlast traust á okkur sem alþjóðlegum framleiðanda á hugbúnaði,“ sagði Magnús Norðdahl, forstjóri félagsins, í samtali við DV á sínum tíma.
Í kynningarefni um merkingar utan á húsinu, sem auglýsingastofan Brandenburg vann, kemur fram að „merkingar skulu uppfylla þarfir hvers og eins leigutaka að eins miklu leyti og hægt er, án þess að gengið sé á rétt annarra leigutaka.“ Ljóst er að forsvarsmenn Íslandsbanka eru himinlifandi með niðurstöðuna, sem uppfyllir allt sem þeir lögðu upp með. Aðrir leigutakar telja hins vegar að þeim hafi verið troðið um tær.
