Reynir Traustason, fyrrverandi ritstjóri DV og stjórnarformaður Stundarinnar, sakar Hannes Hólmstein Gissurarson, prófessor í stjórnmálafræði við Háskóla Íslands, um hræsni. Hann segir að Hannes hafi ekki sett út á það árið 2008 þegar Jón Bjarki Magnússon blaðamaður tók upp samtal sitt við Reyni um hvers vegna frétt Jóns hafi ekki verið birt í blaðinu. Nú gagnrýni Hannes þó fræga upptöku af þingmönnum þar sem þeir sátu á  Klaustur við drykkju í nokkra klukkutíma.

„Er ekki hægt að kæra Klausturþingmennina fyrir það níð sem frá þeim kom eða jafnvel fyrir spillingu? Merkileg umræða um leyniupptökur og ríkur vilji til þess að refsa Báru Halldórsdóttur, Margir þeirra sem nú fjargviðrast voru sáttir þegar ég var tekinn upp á sínum tíma og spilaður í Kastljósi. Ég taldi reyndar að það hefði verið ágætt á mig og gott sjónvarp. Ég man að Hannes Hólmsteinn var alveg sérstaklega ánægður og pönkaðist á mér um tíma. Nú er hann brúnaþungur,” segir Reyni.

Þar vísar Reynir til þessar Jón Bjarki tók upp samtal þeirra tveggja, meðan Reynir var ritstjóri DV og Jón Bjarki blaðamaður á sama miðli, þar sem Reynir sagði að stórir aðilar hafi komið í veg fyrir birtingu fréttarinnar um Sigurjón Árnason, fyrrverandi bankastjóra Landsbankans, í krafti fjármagns. Upptakan var spiluð í Kastljósi og vakti mikla athygli. Reynir réð Jón Bjarka síðar aftur til vinnu.

Hannes hafnar þessum málflutningi Reynis í samtali við DV. Hann segist ekki kannast við að hafa verið ánægður með þá upptöku. „Ég man ekki eftir að hafa látið í ljós neina sérstaka skoðun á því, hvort upptakan 2008 væri réttmæt eða óréttmæt. En það er einn hugsanlegur og mikilvægur munur á upptökum, þegar menn telja sig vera að verja sjálfa sig, og upptökum, þegar menn eru að reyna að koma höggi úr leyni á einhvern annan. Hugsanlega var upptaka blaðamannsins 2008 dæmi um það, að hann væri að reyna að verja sig gegn mögulegum eftirmálum. En upptakan af þingmönnunum á Klaustrinu verður ekki réttlætt með því,“ segir Hannes.