Fréttablaðið skýrir frá þessu í dag. „Ég á von á öllu og er búinn undir það versta.“ Er haft eftir Herbert um stöðuna. Hann segir hana vera ömurlega og þetta sé mjög erfitt. Það sé hins vegar gott að búa sjálfur yfir reynslu af þessari baráttu og vita að hægt sé að sigrast á þessu.
Herbert segist ekki hafa heyrt í syni sínum lengi og hafi því ákveðið að opna á málið á Facebook í gær þar sem hann birti mynd af syni sínum í þeirri von að hann sjái hana og þá sem er skrifuð undir myndina.
„Ég er í raun bara að öskra á hjálp með þessari færslu.“
Segir Herbert.
Langur biðlisti er inn á Vog og segir Herbert leiðinlegt að sjá hversu langir biðlistar eru fyrir fíknisjúklinga. Sonur hans átti pláss á Vogi fyrir um hálfum mánuði að sögn Herberts en mætti ekki og þá sé staðan orðin alvarleg.
„Ég var búinn að heyra í honum þar á undan aðeins og þá var hann tilbúinn að berjast og fá hjálp. Það er í raun skammarlegt hvað það eru langir biðlistar inn á Vog. Við ættum að geta hjálpað betur okkar veikasta fólki.“
Herbert segist aðeins geta beðið og mætt sjálfur á tólf spora fundi. Sonur hans hafi líklega týnt símanum sínum eða selt hann upp í fíkniefnaskuld og því heyri hann ekkert frá honum.
„En menn geta komið til baka og það er von.“
