Fyrrverandi varabæjarfulltrúi Bjartrar framtíðar í Hafnarfirði, Borghildur Sölvey Sturludóttir, hefur krafið Hafnarfjarðarbæ um fjórar milljónir króna í skaðabætur vegna brottvikningar úr starfi. Fréttablaðið greinir frá.

Einar Birkir Einarsson, bæjarfulltrúi BF á síðasta kjörtímabili, var gerður burtrækur úr bæjarstjórn þar sem úrskurðað var að lögheimilisskráning hans í Hafnarfirði væri ógild, en Einar var búsettur í Kópavogi. Var hann þó með lögheimili sitt skráð hjá systur sinni í Hafnarfirði.

Krafa Borghildar byggist meðal annars á því að hún hafi þá með réttu, sem varabæjarfulltrúi, átt að taka sæti Einars og þiggja fyrir það laun. Var krafa hennar lögð fram á bæjarrráðsfundi í gær.

Björt framtíð var í samstarfi með Sjálfstæðisflokknum á síðasta kjörtímabili. Bæjarfulltrúar BF sögðu sig úr flokknum en héldu áfram samstarfinu með Sjálfstæðisflokknum. Þegar meirihlutinn ákvað að breyta skipan skipulags- og byggingarráðs og hafnarstjórn til að tryggja meirihlutann, missti Borghildur sæti sitt í ráðum og stjórnum bæjarins.

Borghildur gerir einnig kröfu um bætur vegna brottvikningu úr launuðum nefndarstörfum og segir að ekki hafi verið farið að lögum og reglum við uppsögnina, auk þess sem engar málefnalegar ástæður hafi legið að baki hennar. Um ólögmæti málsmeðferðarinnar vísar hún til álits samgöngu- og sveitastjórnarráðuneytisins.