Vísindamenn segja að milljörðum og aftur milljörðum af vírusum á fermetra sé beinlínis sópað upp í gufuhvolfið áður en þeim rignir niður á jörðina. Vírusarnir berast upp í gufuhvolfið með lífrænum ögnum í lofti og gasi. Vírusunum rignir síðan niður á jörðina. Þetta getur skýrt af hverju vírusar, sem eru erfðafræðilega eins, finnast stundum í órafjarlægð frá hver öðrum.

Sky-fréttastofan segir að vísindamenn frá Bandaríkjunum, Kanada og Spáni hafi rannsakað þetta og þeir hafi mælt magn eða fjölda vírusa sem berast upp í gufuhvolfið með þessum hætti. Þetta sé í fyrsta sinn sem þetta er mælt. Eins og fyrr sagði er fjöldinn mikill og telur milljarða af vírusum.

Vírusarnir og einnig bakteríur komast ekki alla leið upp í heiðhvolfið en fara samt sem áður hátt upp í veðrahvolfið þar sem þeir geta ferðast þúsundir kílómetra áður en þeim rignir aftur niður á jörðina.

Haft er eftir vísindamönnum að lifandi sjúkdómsveirur geti borist upp í gufuhvolfið á þennan hátt.