WOW air mun fljúga á ný til Tel Aviv í Ísrael og verður flogið þangað fjórum sinnum í viku; á þriðjudögum, miðvikudögum, fimmtudögum og laugardögum.
Þetta kemur fram í tilkynningu frá félaginu en þar segir að flug muni hefjast þann 11. júní og standa út október 2019. Sala flugsæta hefst á morgun, miðvikudag klukkan 10.
„Við erum ánægð með að geta hafið flug til Ísrael að nýju. Við finnum fyrir miklum áhuga á flugleiðinni. Bæði hafa Ísraelar mikinn áhuga á að heimsækja Ísland auk þess sem tengingin við Norður-Ameríku undirstrikar okkar sérstöðu á markaðnum,“ segir Skúli Mogensen forstjóri og stofandi WOW air í tilkynningunni.
„Tel Aviv er næststærsta borg Ísrael og státar af fögrum ströndum og merkum menningarverðmætum. Þar er mikil matarmenning og lifandi mannlíf. Þaðan er hægt að fara í dagsferðir á staði á borð við Dauðahafið, Jerúsalem og Bethlehem,“ segir að lokum í tilkynningu WOW.