Í drögum heilbrigðisráðherra til nýs frumvarps um þungunarrof er lagt til að tímaramminn sem framkvæma má þungunarrof verði lengdur úr 16 vikum í 18, gegn vissum skilyrðum, til dæmis að eftir 18 vikur megi aðeins framkvæma þungunarrof ef lífi móður er stefn í hættu, eða ef fóstrið teljist ekki „lífvænlegt“ til frambúðar.

Sjá nánar: Leggur til að ákvörðunarréttur kvenna til þungunarrofs færist fram til 18. viku meðgöngu

Hinsvegar lagði starfshópur fagfólks til, sem drögin voru unnin upp úr, að tímaramminn yrði lengdur í 22 vikur. Fréttablaðið greinir frá því í dag að af þeim 30 umsögnum sem komnar eru um frumvarpið, snúi flestar að því, að með nýjum lögum sé réttur kvenna skertur frá því sem nú er.

Ljósmæðrafélag Íslands og Félag íslenskra fæðingar- og kvensjúkdómalækna, ásamt öðrum læknum, setja út á drögin, þar sem alvarlegir fæðingargallar greinist ekki fyrr en eftir 20 vikur í sónar. Því sé ákvörðunarréttur móður skertur, þar sem krafa sé gerð um að fóstrið sé ólífvænlegt. Hinsvegar sjáist sjaldnast hvort fóstur sé lífvænlegt þó merki um alvarlega fötlun sjáist. Þá séu einstaklingar og fjölskyldur misvel í stakk búnar til að eignast barn með slíka fötlun og frumvarpsdrögin komi í veg fyrir að það fólk geti tekið ákvörðun um slíkt. Mælast þessir aðilar því til að tímaramminn verði lengdur í 22. vikur.