Donald Trump átti aldrei von á því að vinna forsetakosningarnar í Bandaríkjunum og ætlaði að nota framboðið til að öðlast aukna frægð, meira sjónvarpsáhorf og að styrkja þannig viðskiptaveldi sitt. Þegar úrslitin lágu fyrir brast Melania, eiginkona hans, í grát og það voru ekki gleðitár. Sjónarvottur á kosninganóttinni sagði um Trump: „Það var eins og hann hefði séð draug.“
Þessu heldur rithöfundurinn og blaðamaðurinn Michael Wolff fram en hann gaf í vikunni út bókina Fire and Fury: Inside the Trump White House. Bókin hefur vakið gífurlega athygli og mikla reiði forsetans sem sakar höfundinn um lygi. Í bókinni er því haldið fram að allir aðstoðarmenn og starfsfólk Trump viti að hann sé óhæfur og valdi ekki starfinu.
Upplýsingarnar um að Trump hafi ekki ætlað sér að verða forseti er að finna í langri grein sem Wolff birti í The New Yorker og virðist byggð á efni úr bókinni.
Meðal þess sem kemur fram í greininni er að þrátt fyrir auðævi sín var Trump mjög tregur til að láta eigin fjármuni í kosningabaráttuna heldur þáði framlög og veitti kosningasjóðnum lán sem hann ætlaðist til að fá greitt þegar framlaga hefði verið aflað í baráttuna.
