Lilja Alfreðsdóttir, mennta- og menningarmálaráðherra, segir brýnt að RÚV fari eftir lögum í sínum rekstri. Tilefnið er að RÚV hóf nýlega innreið sína á nýjan markað undir merkjum RÚV-Stúdíó, sem leigir út myndver sitt ásamt tækjabúnaði til sjónvarps- og kvikmyndagerðar, öðrum fyrirtækjum í sama bransa til mikillar gremju.
Lilja segir við Fréttablaðið í dag að mikilvægt sé að hrinda þessum lögum í framkvæmd:
„Það er mjög skýrt að samkvæmt fjórðu grein laga um Ríkisútvarpið ber RÚV að stofna dótturfélög um samkeppnisrekstur sinn. Ég tel brýnt að hrinda því í framkvæmd og stjórn RÚV og stjórnendur hafa verið að vinna að því. Það er stjórnar RÚV að fylgja þessu eftir.“
Magnús Geir Þórðarson, útvarpsstjóri, hefur sjálfur sagt að RÚV-Stúdíó sé ekki dótturfélag RÚV líkt og lög kveði á um, heldur „afmarkað svið í skipulagi RÚV“, líkt og auglýsingasalan.
Óli Björn Kárason, þingmaður Sjálfstæðisflokksins, hefur kallað eftir því að RÚV fari að lögum, sem og Samtök iðnaðarins.
Lilja tekur undir áhyggjur þeirra:
„Mér finnst mikilvægt að tryggja aðskilnað á milli almannahlutverks og samkeppnisreksturs RÚV. Það er í takt við tillögurnar sem ég kynnti nýverið og miða að því að styðja við einkarekna fjölmiðla. Það er ljóst að RÚV er þjóðinni kært og ég vil hafa öflugan miðil í almannaþágu. Við þurfum að stuðla að auknu jafnræði á íslenskum fjölmiðlamarkaði.“