„Á nýafstöðnu þingi ASÍ-UNG mátti greina mikinn samhug og baráttuvilja hjá ungu fólki innan verkalýðshreyfingarinnar. Málþing um hlutverk stéttarfélaga og þær áherslur sem ungt fólk vill sjá í komandi kjarasamningum bar einna hæst á þinginu,“

segir í tilkynningu frá ASÍ-UNG, ungliðahreyfingu ASÍ.

Fimmta þing ASÍ-UNG var haldið föstudaginn 14. september á Hótel Reykjavík Natura.  Að þessu sinni var sérstaklega hugað að hlutverkum stéttarfélaga hvað varðar yngra fólk á vinnumarkaði og hvaða áherslur sá hópur vill sjá í komandi kjarasamningum.

„ASÍ-UNG eru samtök ungs fólks, 16-35 ára, innan verkalýðshreyfingarinnar sem sér til þess að hagsmunamál ungs fólks á vinnumarkaði séu ávallt á dagskrá hreyfingarinnar. Á þessum aldri eru margir að stíga sín fyrstu skref á vinnumarkaði, stofna fjölskyldur og kaupa húsnæði og því mikilvægt að rödd þeirra heyrist hátt og skýrt,“

segir á heimasíðu ASÍ.

Þingið sátu fulltrúar aðildarfélaga ASÍ á aldrinum 16-35 ára hvar meðfylgjandi ályktun var samþykkt í lok þingsins en hún sýnir ágætlega hvar áherslur ungs fólks innan verkalýðshreyfingarinnar liggja í komandi kjaraviðræðum:

• ASÍ-UNG ályktar um nauðsyn þess marka skýra stefnu í húsnæðismálum til þess að tryggja ungu fólki húsnæði við hæfi.
• ASÍ-UNG telur það vera grundvallaratriði að allir hafi möguleika á öruggu búsetuformi sem hentar á viðráðanlegum kjörum.
• ASÍ-UNG krefst þess að persónuafsláttur verði hækkaður þannig að lágmarkslaun verði skattlaus.
• ASÍ-UNG krefst þess einnig að aldurstengd launamismunun verði afnumin með öllu enda er hún klárt brot á mannréttindum.
• Jafnframt gerir ASÍ-UNG kröfu um að ungt fólk eigi sæti við samningaborðið til þess að tryggja hagsmuni þess.
• ASÍ-UNG leggur ríka áherslu á að vinnueftirlit verði aukið og viðurlög vegna brota á vinnustað verði hert.
• Þing ASÍ-UNG leggur áherslu á jafnvægi milli einkalífs og vinnu. Brúa þarf bil milli fæðingarorlofs og leikskóla og auka orlofsrétt vegna vetrarfría í skólum.