Umræður um fjárlög stóðu yfir á Alþingi á föstudaginn og tóku margir til máls, þar á meðal Birgir Þórarinsson, þingmaður Miðflokksins. Í ræðu sinni ræddi hann greiðslur til ríkisstjórnarinnar, þá sérstaklega fjármuni sem fara til að greiða fyrir aðstoðarmenn ráðherra ríkisstjórnarinnar, en samkvæmt fjárlögum er áætlað að þær verði 635 milljónir króna. Hann benti einnig á að greiðslur þessar hafi hækkað um 175 milljónir frá síðasta ári ásamt því að aldrei í sögu landsins hafi verið jafn margir aðstoðarmenn hjá ráðherrum ríkisstjórnarinnar.
Í ræðu sinni hélt Birgir því einnig fram á Alþingi að Sigmundur Davíð Gunnlaugsson hefði eingöngu verið með einn aðstoðarmann þegar hann var forsætisráðherra, þegar í raun að Sigmundur var með sjö aðstoðarmenn. Í frétt Vísis og Fréttablaðsins frá árinu 2014 um málið, kemur fram að aðstoðarmenn Sigmundar hafi kostað 64,3 milljónir króna á ári en aðstoðarmenn hans voru:
Jóhannes Þór Skúlason, aðstoðarmaður
Sigurður Már Jónsson, upplýsingafulltrúi ríkisstjórnarinnar
Benedikt Árnason, efnahagsráðgjafi forsætisráðherra
Lilja D. Alfreðsdóttir, verkefnisstjóri
Hrannar Pétursson, verkefnisstjóri
Margrét Gísladóttir, sérstakur ráðgjafi ráðherra
Ásmundur Einar Daðason, aðstoðarmaður, en hann var jafnframt þingmaður og þáði ekki laun fyrir vinnu sína fyrir ráðherra umfram þingfararkaup sitt.
Uppfært 17.9.2018 13:50
Jón Pétursson, núverandi aðstoðarmaður Sigmundar Davíðs, segir að frétt Vísis og Fréttablaðsins sé röng um fjölda aðstoðarmanna ráðherra í ráðherratíð Sigmundar Davíðs Gunnlaugssonar. Hann bendir á að einstaka verkefnastjórar og fjölmiðlafulltrúar og þess háttar teljast ekki til aðstoðarmanna.
Hvorki Fréttablaðið né Vísir drógu frétt sína um málið til baka á sínum tíma.
Sigmundur Davíð sjálfur tjáði sig einnig um málið á Facebook síðu sinni.
Hér að neðan má sjá ræðu Birgis.