Helgi Hrafn Gunnarsson vill breyta lögum um þjóðsöng Íslands, Lofsöng, en strangar reglur gilda um notkun hans. Eins og Helgi bendir á er til dæmis ólöglegt að gefa út rappútgáfu af þjóðsöngnum. Þjóðsöngurinn hefur lengi verið umdeildur og segja margir hann þjóna tilgangi sínum illa. Mörg önnur lög séu betur til þess fallin að hrista þjóðina saman á íþróttaleikjum og víðar. DV tók saman fimm lög sem henta betur en Lofsöngurinn.

Kvaðning – Skálmöld

Skálmöld spilar þjóðlegt víkingarokk og allir elska hljómsveitina, meira að segja eldra fólk sem aldrei hefur hlustað á þungarokk á ævinni. Lagið er grípandi og vígreift og myndi vekja gæsahúð í hvert einasta skipti á Laugardalsvellinum. Ókosturinn er að lagið er átta mínútur að lengd og yrði því að skera niður.

Húsið og ég – Grafík

Veðurfræðingar hafa sagt okkur að búast við fleiri rigningarsumrum á komandi árum. Til að halda andlegri heilsu væri því kannski réttast fyrir þjóðina að gera rigninguna að bandamanni sínum. „Mér finnst rigningin góð“ yrði hin nýja sjálfsmynd Íslendinga.

Immigrant Song – Led Zeppelin

Sumir myndu segja það óþjóðlegt að velja útlenskt lag sem þjóðsöng. En Immigrant Song var samið á Íslandi og um Ísland af stærstu rokkhljómsveit sögunnar. Við ættum að hampa því.

Söknuður – Villi Vill og Jóhann Helgason

Söknuður er flott lag sem allir þekkja, ekki bara Íslendingar heldur útlendingar líka í flutningi Josh Groban. Að gera Söknuð að þjóðsöng landsins myndi hjálpa Jóhanni Helgasyni höfundi í málaferlum sínum við norska ódáminn Rolf Lovland sem stal því.

Draumur um Nínu – Stefán og Eyfi

Fæstir Íslendingar kunna textann að Lofsöngnum en allir, hver einn og einasti, getur sungið Nínu. Selma og Jóhanna Guðrún komust í annað sæti en Draumur um Nínu er og verður ávallt Eurovision-lagið okkar.