Ragnheiður Sara Sigmundsdóttir hefur neyðst til að draga sig úr keppni á heimsleikunum í Crossfit sem nú fara fram í Wisconsin í Bandaríkjunum. Ástæðan er sú að Ragnheiður Sara brákaði rifbein vegna álags í byrjun árs og meiðslin hafa nú tekið sig upp aftur. Ragnheiður Sara greinir frá þessu í tilfinningaþrunginni færslu á Instagram.
„Ég hóf keppni á föstudag ennþá í afneitun og eftir „Clean and jerk ladder“ urðu verkjatöflur minn besti vinur. Ég ákvað samt að halda áfram og harka af mér þrátt fyrir viðvörunarbjöllurnar,“ skrifar Ragnheiður Sara og bætir við: „Þetta er eitt það erfiðasta sem ég hef þurft að gera í lífinu en ég hef ákveðið að draga mig úr keppninni vegna álagsmeiðsla í rifbeinum.“
Hún var í 11. sæti leikanna eftir tvo keppnisdaga þegar hún ákvað að hætta keppni en leikarnir eru þeir fjórðu sem þessi magnaða íþróttakona tekur þátt í.
https://www.instagram.com/p/BmFD1XZFU_T/?utm_source=ig_embed&utm_campaign=embed_loading_state_control
