Farþegalest fór út af sporinu
Óttast er að fjöldi fólks hafi slasast og einhverjir látist þegar farþegalest fór út af sporinu og keyrði inn í Hoboken lestarstöðina í New Jersey í dag.
Þetta kemur fram á vef BBC. Slysið varð á háannatíma á stöðinni en engar staðfestar fregnir hafa borist af því hversu umfangsmikið slysið er.
Lögregluyfirvöld og sjúkraflutningamenn eru komnir á staðinn og eru að loka vettvangi.
Óstaðfestar heimildir herma að yfir 100 séu slasaðir og fjölmargir enn fastir undir rústum á lestarstöðinni og inni í lestinni sjálfri.
NBC greinir frá því að þrír séu látnir en búist er við að tala látinna eigi eftir að hækka.
Stöðin er mikið notuð af fólki sem ferðast til og frá Manhattan á degi hverjum en hún er jafnframt sú fjölfarnasta í fylkinu. 50 þúsund farþegar fara um Hoboken stöðina á degi hverjum.