Katrín Jakobsdóttir er í plakatstærð á forsíðu New York Times í dag ásamt Theresu May og Donald Trump. Það er náttúrlega ekki tilvljun hvernig þessi mynd er skorin. Katrín er kona með nokkuð eindregin og margháttuð svipbrigði – og það er hægt að lesa margt úr svip hennar þar sem hún stendur rétt fyrir aftan Bandaríkjaforsetann og sér atganginn í honum.

Ferð Trump til Evrópu er slík að annað eins þekkist ekki í sögunni. Hvar sem hann fer verður skandall. Það er alveg öruggt að Theresa May væri tilbúin að setja upp áþekkan svip og Katrín Jakobsdóttir. Trump kemur til Englands, finnur áætlunum May um Brexit allt til foráttu, segir að hann hafi sagt henni hvernig hún ætti að gera þetta, en hún hafi ekki hlýtt.

Svo fer hann að mæra Boris Johnson, hinn nýrekna erkiandstæðing May í Íhaldsflokknum, og segir að hann sé nú fínn náungi sem yrði afbragðs forsætisráðherra. May dauðsér líklega eftir því að hafa boðið Trump í þessa heimsókn. Hann lætur hins vegar engan bilbug á sér finna og segir að fólk á Englandi og Skotlandi kunni sérlega vel við sig – they like me a lot, segir hann.