Umboðsmaður Alþingis hefur í bréfi til atvinnuvega- og nýsköpunarráðuneytisins áréttað fyrri ábendingu um skyldu stjórnvalda til að veita upplýsingar um starfsheiti umsækjenda um opinbert starf þegar umsóknarfrestur er liðinn. Tilefnið er nýleg birting ráðuneytisins á lista yfir umsækjendur um starf skrifstofustjóra á skrifstofu landbúnaðar og matvæla í atvinnuvega- og nýsköpunarráðuneytinu þar sem einungis nöfn umsækjenda eru birt.

Þá hefur það vakið athygli umboðsmanns að á listum sveitarfélaga, sem þau hafa nýlega birt yfir umsækjendur um starf bæjarstjóra og sveitarstjóra, eru starfsheiti umsækjenda ekki alltaf tilgreind.

Umboðsmaður Alþingis hefur áður sent öllum ráðuneytum í Stjórnarráðinu bréf þar sem vakin var athygli á þessari skyldu stjórnvalda, sbr. frétt á heimasíðu umboðsmanns 29. mars 2016.

Af framangreindu tilefni áréttar umboðsmaður að samkvæmt lögum er skylt að veita upplýsingar um starfsheiti umsækjenda um opinbert starf þegar umsóknarfrestur er liðinn og upplýsingarnar eru afhentar samkvæmt beiðni. Markmiðið er að mæta sjónarmiðum um opna stjórnsýslu og stuðla að opinni umræðu um stöðuveitingar hjá opinberum aðilum.

Jafnframt áréttar umboðsmaður þá afstöðu sína að þegar stjórnvöld eiga frumkvæði að birtingu umsækjendalista verði að ganga út frá því að starfsheiti umsækjendanna séu tilgreind rétt eins og þegar einhver hefur óskað sérstaklega eftir því að fá upplýsingarnar. Að öðrum kosti geti slíkt frumkvæði í reynd haft þau áhrif að minna gegnsæi verði um upplýsingar sem löggjafinn hefur ákveðið að eigi erindi við almenning. Þá telur umboðsmaður jafnframt ljóst að slíkt væri í einnig í samræmi við vandaða stjórnsýsluhætti.