Gunnar Sigurður Guðmundsson er maðurinn sem birtist í umfjöllun CNN um áreiti karlkyns stuðningsmanna í garð fjölmiðlakvenna. Í myndbandinu sem DV fjallaði um fyrr í dag má sjá Gunnar hala sér upp að fréttakonu í beinni útsendingu og setja andlitið á sér þétt upp að andliti konunnar.

Gunnar segir í samtali við Vísi að það sé „falsfréttir“ að hann hafi reynt að kyssa konuna. „Kyn fréttamannsins skipti mig engu máli. Ég ætlaði bara að fíflast aðeins og fá smá athygli. Ég var að þykjast vera þessi víkinga-týpa sem er að búa sig undir orrustu, þetta var fyrir leikinn við Argentínu,“ segir Gunnar Sigurður.

Hann segir enn fremur að þetta hafi einungis verið fíflagangur. „Konan mín er hérna með mér og ég tel mig alveg nógu vel gefinn til að vita betur en að vera að grípa í fólk og kyssa það. Þetta hafði nákvæmlega ekkert með neitt kynferðislegt að gera. Það vildi bara svo til að þarna var kona fyrir framan myndavélina, ég hefði látið alveg eins ef þetta hefði verið karl. Þannig að ef einhver er að leita að afsökunarbeiðni frá mér, þá hef ég bara ekkert til að biðjast afsökunar á,“ segir Gunnar.