MMR kannaði afstöðu Íslendinga
62,4 prósent þeirra sem svöruðu könnun MMR sögðust vera andvígir búvörusamningunum, en 16,3 prósent kváðust vera fylgjandi. MMR kannaði afstöðu Íslendinga til búvörusamninganna sem samþykktir voru á Alþingi þann 13. september síðastliðinn.
Í frétt á vef MMR þar sem fjallað er um könnunina kemur fram að töluverður munur hafi verið á afstöðu fólks gagnvart samningunum eftir aldri. Þannig voru þeir sem eldri eru líklegri til að vera fylgjandi búvörusamningunum.
„Sem dæmi sögðust 31% þeirra sem eru 68 ára eða eldri vera fylgjandi samningunum á meðan einungis 8% þeirra sem eru 29 ára eða yngri sögðust vera fylgjandi búvörusamningunum.
Einnig munaði miklu þegar afstaða var skoðuð eftir búsetu, en 28% þeirra sem búsett voru á landsbyggðinni sögðust vera fylgjandi búvörusamningunum en einungis 10% þeirra sem búsett voru á höfuðborgarsvæðinu,“ segir í frétt MMR.
Þá er stuðningsfólk Framsóknarflokksins langlíklegast til að vera fylgjandi búvörusamningunum, en 55 prósent þeirra sem styðja flokkinn kváðust vera fylgjandi samningunum. Þau sem sögðust styðja Samfylkinguna, Bjarta framtíð, Pírata og Viðreisn voru hins vegar ólíklegust til að vera fylgjandi samningunum, en yfir 75 prósent stuðningsfólks þessara flokka sögðsust andvíg samningunum.
985 einstaklingar, 18 ára og eldri, svöruðu könnun MMR sem var framkvæmd dagana 20. til 26. september.