Minnst tveir kettir hafa drepist úr frostlögseitrun í Hveragerði í vor. Magnús Þór Sigmundsson tónlistarmaður missti köttinn sinn úr frostlögseitrun fyrr í vor en sonur Magnúsar hefur misst tvo ketti úr sömu eitrun, þann síðasta í vikunni sem leið. Fyrri kötturinn drapst árið 2015 eftir að hafa étið fisk sem var eitraður með frostlegi. Samkvæmt upplýsingum frá MAST var sá biti svo gegnsýrður af frostlegi að hann fraus ekki þegar hann var geymdur í frysti yfir nótt. Í gær, fimmtudag, var staðfest að seinni kötturinn hefði einnig drepist úr samskonar eitrun.
„Það er hálfur bærinn að pæla í þessu, það veit samt enginn hvernig á að tækla þetta. Þú nærð ekkert þessum manni nema standa hann að verki held ég,“ segir Magnús. Að hans sögn fannst fiskur í Smjörvaboxi í bænum. „Þetta box fannst á svipuðum tíma og kettirnir veiktust og það var á mjög skrítnum stað á milli húsa. Einhver hefur þurft að hafa talsvert fyrir því að koma því þar fyrir. Það þarf að fara inn á lóðina og lauma því þangað. Þarna gengur enginn maður um, nokkurn tímann, þetta er skot á milli húsa þar sem dýr komast í þetta.“
Eins og áður segir veiktust kettirnir á svipuðum tíma og boxið fannst. „Annar lifði í þrjá daga, hinn dó viku síðar. Við vorum að reyna að halda í honum lífinu með því að fara með hann á dýraspítala á hverjum degi og gefa honum vatn í æð, en það gekk ekki,“ segir Magnús Þór.
Gunnar Þorkelsson, héraðsdýralæknir á Suðurlandi, segir í samtali við DV að Smjörvaboxið og fiskurinn sem fannst í því hafi verið sent í greiningu og niðurstöður liggi ekki enn fyrir. Gunnar hefur fengið mörg slík mál inn á borð til sín undanfarin ár. „Þetta er alveg óþolandi, þetta er bæði mjög kvalafullur dauðdagi og svo eru það börn og eldra fólk sem eiga þessi dýr. Þetta er andstyggilegt,“ segir Gunnar.
Magnús segir þetta koma í veg fyrir að eigendur í Hveragerði vilji tengjast dýrunum sínum. „Þetta hefur svo margar hliðar svona árás. Svo eru börn sem ganga um þetta port og eru að leika sér, það er stórhættulegt að hugsa til þess að einhver vitleysingur sé að eitra, án þess að fullyrða að þessi fiskur sem fannst hafi verið eitraður.“
Í febrúar síðastliðnum fjallaði DV ítarlega um þann fjölda katta sem hafa drepist eða horfið á Suðurlandi undanfarin ár. Alls hafa um fimmtíu kettir lent í þessum hörmulegu örlögum undanfarnið og eru margir kattareigendur í sárum vegna þess. Bergljót Davíðsdóttir er ein þeirra en hún hefur misst fjóra ketti á undanförnum fjórum árum. Hún lýsti ástandinu svona:
„Kattahvörfin og drápin á þeim hafa valdið fólki áhyggjum og ég lít á þetta sem samfélagslegt vandamál sem ber að taka á af hálfu bæjaryfirvalda því þetta setur ljótan blett á þennan annars ágæta bæ. Ég hef rætt það við bæjarstjóra, Aldísi Hafsteinsdóttur, en hún er ekki sömu skoðunar. Mér finnst það alvarlegt mál, þegar fólk er farið að nefna nöfn á mönnum sem hugsanlegum kattaníðingum, án þess að geta nokkuð sannað. Það er líka alvarlegt mál ef saklaust fólk er nefnt í þessu sambandi og við það festist níðingsorð. Dæmi eru um að þeir sem misst hafa ketti sína hafa orðið svo reiðir að þeir hafi viljað lúskra á ákveðnum mönnum og heimsótt þá. Þess vegna er svo mikilvægt að taka á þessu máli af alvöru og uppræta það,“ sagði Bergljót.