Knattspyrnusamband Íslands hefur sagst ætla að aðstoða þá sem vilja sjá leiki íslands gegn Nígeríu og Króatíu á HM í knattspyrnu, þar sem enn séu lausir miðar á leikina. Klara Bjartmarz, framkvæmdarstjóri KSÍ, segist ætla að aðstoða alla þá sem þurfa svokallað Fan ID, sem er nauðsynlegt til að vera hleypt inn á leikvangana í Volgograd og Rostov, þann 22. júní annarsvegar og 26. júní hinsvegar.
Miðar eru einnig fáanlegir bæði hjá KSÍ og hjá FIFA, sem og í Facebook-hópum hjá íslendingum sem ganga þar kaupum og sölum.
Hinsvegar er ferðalagið nokkuð langt og dýrt eftir því.
Samkvæmt vefnum turisti.is tekur það um 15-20 klukkustundir að ferðast með lest frá Moskvu til borganna Volgograd og Rostov.
Þá segir að það kosti 120-160 þúsund að finna flug með tveimur til þremur millilendingum frá Leifsstöð, en fyrir sömu upphæð mætti fljúga til Volgograd á fimmtudaginn og heim frá Rostov á miðvikudaginn í næstu viku og þannig ná báðum leikjum Íslands.
Enn eru laus herbergi í Volgograd og Rostov í kringum leikdagana, samkvæmt upplýsingum booking.com. Verðbilið er nokkuð breitt, allt frá 4000 þúsund krónum nóttin fyrir einstaklingsherbergi, upp í 170 þúsund krónur fyrir 60 fermetra íbúð með fjórum gistiplássum, við hliðina á leikvanginum.
Ljóst er að ferðalagið mun alltaf kosta skildinginn, þegar flugfarið, hótelverðið og miðaverðið er lagt saman.
En ef vel gengur, er það þá ekki alltaf þess virði ?