KFUM og KFUK hafa gefið út yfirlýsingu vegna ljósmyndar sem birtist á Facebook síðu sumarbúðanna Ölvers. Þar mátti sjá manneskju málaða dökka á hörund og með afró hárkollu. Myndbirtingin vakti mikla reiði á samfélagsmiðlum og ræddi DV við Martinu K. Williams, frá Jamaíku, um málið en hún ákvað að leyfa sjö ára dóttur sinni ekki að fara í sumarbúðirnar.

Tilkynningin er eftirfarandi:

„Mynd úr starfi sumarbúðanna í Ölveri hefur vakið umræðu á samfélagsmiðlum. Við hörmum mjög atvikið sem varð vegna þekkingarskorts starfsmanna.

Myndin er af karakter í leikriti. Þetta var vanhugsað gervi og aldrei meint á neikvæðan eða niðrandi hátt.

Í sumarbúðum KFUM og KFUK kennum við börnum og unglingum að allir eru jafnir, alltaf. Í starfi okkar er leitast við að mæta hverri manneskju af umhyggju, kærleika og virðingu.

Við þökkum allar ábendingar sem hafa borist og tökum þær alvarlega.

Við biðjumst afsökunar og munum leitast við að atvik sem þetta endurtaki sig ekki.”