Kjörsókn eykst lítillega á milli ára í Reykjavík, kl. 12:00 í dag voru 8,57% þeirra sem eru á kjörskrá búnir að kjósa. Á sama tíma í kosningunum 2014 voru 7,88% búnir að kjósa. Kjörsóknin er þó minni en í kosningunum 2010 þegar yfir 10% voru búin að kjósa. Hægt er að fylgjast með kjörsókninni á vef Reykjavíkurborgar, tölurnar eru uppfærðar á klukkutíma fresti. Svo virðist sem kjósendur láti veðrið ekki láta á sig fá en leiðindaveður er víða á landinu í dag, samkvæmt Veðurstofu Íslands verður þó stytt upp skömmu fyrir lokun kjörstaða kl. 22.
Margir ráku upp stór augu við að sjá kjörseðilinn sem er heill metri að lengd að þessu sinni. 16 framboð bjóða fram í Reykjavík sem er metfjöldi. Dæmi eru um að nokkrir hafi kvartað undan því að framboð sem eru aftarlega í stafrófinu séu ekki jafn áberandi og þau sem eru framar, þurfa kjósendur að fletta kjörseðlinum. Ljósmyndari DV fékk ekki að taka mynd af kjörseðlinum sjálfum, bannað er að mynda seðilinn þar sem slíkt brýtur í bága við kosningalög.
