„Við vekjum athygli á að spáð er leiðindaveðri á höfuðborgarsvæðinu næstu daga, en strax síðdegis verður komin suðaustanátt með 13 til 18 metrum á sekúndu og talsverðri rigningu,“ segir í tilkynningu á Facebook-síðu lögreglunnar á höfuðborgarsvæðinu.

Þar er varað við óvenjuleiðinlegu veðri næstu daga.

„Veðrið á morgun, samkvæmt spánni, er heldur ekkert til að hrópa húrra fyrir og þá lítur helgina alls ekki vel út. Það gæti orðið virkilega hvasst á laugardag og síðan er viðbúið að þessi lægð haldi áfram að stríða okkur líka á sunnudag. Í ljósi þessa minnum við fólk á að huga að lausamunum og festa þá niður eða koma í skjól, en hér er t.d. átt við garðhúsgögn og trampólín.“

Haraldur Eiríksson, veðurfræðingur hjá Veðurstofu Íslands, segir í samtali við mbl.is að veðurfarið nú sé óvenjulegt. Yfirleitt sé þurrasti tími ársins um þetta leyti en því sé ekki fyrir að fara í ár.

Ef marka má langtímaveðurspá norsku veðurstofunnar, yr.no, verða næstu dagar ekkert sérstakir á höfuðborgarsvæðinu hvað góðviðri varðar. Til 26. maí næstkomandi, að minnsta kosti, verður sólin ekki mjög áberandi og þá mun hitinn ekki fara yfir 10 gráður, verður hann yfirleitt á bilinu 4-9 stig.