Foreldrar Kim Wall, sænsku fréttakonunnar sem Peter Madsen er grunaður um að hafa myrt um borð í kafbátnum UC3 Nautilus í ágúst á síðasta ári, segjast ekki hafa haft áhyggjur af fyrirhugaðri ferð Kim með kafbátnum. Þau segjast oft hafa haft áhyggjur af Kim þegar hún var á ferð um heiminn vegna vinnu sinnar en engar áhyggjur hafi sótt að þeim þegar hún fór í kafbátssiglinguna.

Þetta kemur fram í viðtali við þau sem var birt á Kanal 5 í Danmörku á miðvikudagskvöldið. Foreldrarnir, Ingrid og Joachim Wall, hafa ekki verið mikið í kastljósi fjölmiðla í tengslum við réttarhöldin yfir Madsen en þau standa enn yfir.

„Við eigum ekki fleiri orð, einfaldlega ekki.“

Sagði Joachim í viðtalinu. Ingrid sagði að þau hafi oft haft áhyggjur af Kim þegar hún var á ferðalögum, meðal annars til Tíbet og Norður-Kóreu en engar áhyggjur hafi sótt að þeim fyrir kafbátsferðina.

Ingrid og Joachim hafa stofnað sjóð í nafni Kim en hann mun styrkja ungar fréttakonur sem vilja breyta heiminum með sögum sínum, eins og Kim vildi og gerði.

„Nokkrum dögum eftir að hún hvarf ákváðum við að þetta skyldi ekki enda þarna í kafbátnum. Hún átti að lifa áfram. Þá kviknaði hugmyndinn um sjóðinn.“

Sagði Ingrid og bætti við:

„Sjóðurinn hefur hjálpað okkur að einblína á Kim og framtíðina. Hann hjálpar okkur.“