Ísland er ein af stofnþjóðum Atlantshafsbandalagsins. Og við höfum varnarsamning við Bandaríkin sem enn er í gildi þótt bandaríski herinn hafi farið héðan fyrir rúmum áratug. Við Íslendingar leggjum sjálfir afar lítið af mörkum til varna okkar. Varnir- og hermál eru hverfandi smár útgjaldaliður á fjárlögum.
Hvað ætli við eigum að borga Bandaríkjunum mikið samkvæmt þeirri formúlu Trumps að Natóríki séu stórskuldug gagnvart Bandaríkjunum? Hvað ætti skuldin að reiknast langt aftur í tímann?
Við getum velt þessu fyrir okkur en krafan um að við borgum meira er auðvitað ekki komin fram með beinum hætti – enn eru þetta ekki nema yfirlýsingar í hinum málglaða Trump.
En svo mætti náttúrlega snúa þessu við og spyrja hvort Bandaríkin skuldi okkur kannski fyrir notkun á landi og aðstöðu?
