Ég hef ekkert annað frétt af þessu, en samkvæmt frétt Stöðvar 2 hefur mál fimm blaðamanna sem eru sakaðir um að hafa rofið bankaleynd verið sent áfram til saksóknara.

Ég var í þessum hópi, ásamt meðal annars Agnesi Bragadóttur og Kristni Hrafnssyni.

Agnes segir í viðtali við Vísi.is að þetta sé áfellisdómur yfir íslenska kerfinu, sönnun þess að það virki ekki:

„Ég hefði haldið að rannsóknaraðilar að bankahruni hefðu öðrum og þýðingarmeiri hlutum að sinna heldur en að reyna að koma í veg fyrir það að upplýsingum sem varða allan almenning kæmust á framfæri almennings.“

Ég var að vona að þetta yrði úr sögunni með nýjum forstjóra og nýrri stjórn FME, en svo virðist ekki vera.

Til upprifjunar má nefna að Agnesi og Kristni var gefið að sök að hafa birt upplýsingar um lánastarfsemi Kaupþings.

Mér var aftur á móti borið á brýn að hafa birt bréfaskipti úr stjórn Glitnis frá því á dögum hrunsins, en þar kom fram að Geir Haarde forsætisráðherra og Árni Mathiesen fjármálaráðherra lögðu hart að stjórninni að lagfæra stöðu peningamarkaðssjóða.

Þá grein má lesa hér.

En eins og ég segi, þá veit ég ekki hvort ég er enn í þessum hópi – en ég væri stoltur af því.