Síðan í maí 2009 hefur skilanefnd Glitnis notið aðstoðar þekkts fyrirtækis sem fæst við alþjóðlegar fjármálarannsóknir, Kroll að nafni. Fyrirtækið hefur mikla reynslu af fjármálabrotum og hruni fyrirtækja og því að rekja slóð peninga. Bak við þetta eru náttúrlega erlendir kröfuhafar sem ætla ekki að láta það óátalið að tapa milljörðum á milljarða ofan.

Nú hefur verið lögð upp einhvers konar strategía þar sem er sótt er að eigendum og stjórnendum Glitnis út um allan heim. Tilgangurinn er væntanlega að reyna að endurheimta sem mesta fjármuni. Maður spyr að hve miklu leyti Kroll sé þarna að baki?

Jón Ásgeir telur greinilega að svo sé og segir í viðtali við eftirlætisfjölmiðil sinn, Pressuna, að Kroll og skilanefndin hafi tekið íslenskt réttarfar í sínar hendur.

En málið hefur líka aðra hlið sem snýr að saksókn á Íslandi. Þessi málarekstur skilanefndarinnar breytir náttúrlega engu um það.

Við því er að búast að röðin komi að Glitnismönnum hjá sérstökum saksóknara.