Grímur Atlason, VG-ari og sveitarstjóri í Dalabyggð, skrifar á vef sinn, meðal annars um misvægi atkvæða á Íslandi:

— — —

„Þess ber að geta að VG menn í Skagafirði og NV landi hafa talsvert vægi í stjórnmálum á Íslandi. Þannig kusu 4200 manns í kjördæminu flokkinn í síðustu kosningum. Það skilaði flokknum 3 af 9 þingmönnum kjördæmisins. Á sama tíma kusu rúmlega 8000 manns VG í öðru af tveimur kjördæmum Reykjavíkur. Það skilaði 2 af 11 þingmönnum. Það er því ljóst að kjósendur flokksins í Skagafirði hafa umtalsvert meira vægi en aðrir kjósendur á Íslandi.

Þúfnahugsun og vægi þröngra hagsmuna hafa ráðið allt of miklu allt of lengi. Stjórnsýslan á Íslandi er bæði veik og léleg. Það þarf að taka hana í gegn á öllum vígstöðvum. Flokksgæðingum hefur verið hlaðið á hillur ráðuneytanna um áratuga skeið. Fagmennskan hverfur og eftir stendur pot vina til vina. Þetta er með öllu óþolandi og verður ekki breytt með samþykktum úr Skagafirði.

Skagfirðingar berjast á hæl og hnakka til þess að bjarga vinveittum ráðherra einhverra ímyndaðra hagsmuna. Þetta er rökvilla. Hagsmundir Íslands sem heildar skipta meira máli en skammtímatuð og þúfnahyggja. Potið og sérhagsmunagæslan komu okkur í vandræðin. Leiðin út úr vandanum er m.a. sú  að vægi Skagafjarðar verði eins og annarra á Íslandi.“