Það yrði meiriháttar áfall fyrir bíómenninguna á Íslandi ef kvikmyndahúsið Regnboginn lokaði.

Jú, húsið er kannski ekki sérlega glæsilegt lengur, en þarna eru nokkrir bíósalir þar sem er rúm til að sýna kvikmyndir sem ella fengju varla inni í kvikmyndahúsunum hérna.

Því úrvalið í bíóunum í Reykjavík er vont og fer versnandi.

Stundum eru haldnar einhvers konar kvikmyndahátíðir og þá er dælt út á skömmum tíma myndum sem teljast hafa listrænt gildi. Maður þarf að vera á tánum til að missa ekki af myndunum sem sýndar eru á þessum hátíðum.

Kvikmyndasafn Íslands hefur aðsetur í Bæjarbíói í Hafnarfirði, það heldur uppi ágætri starfsemi, en staðsetningin er úr alfaraleið. Hafnarfjörður er ágætur bær, en þeir sem hafa sótt hann heim vita að í miðju bæjarins er aldrei neinn gangandi maður á ferli að kvöldlagi. Það er mikilvægur þáttur í menningarlífi þjóðar að hægt sé að sjá sígildar kvikmyndir í bíóhúsi.

Ari Kristinsson kvikmyndagerðarmaður varpar fram þeirri hugmynd að Regnboganum verði breytt í kvikmyndamiðstöð með listabíói og fleiru tilheyrandi. Hann segir í viðtali við Fréttablaðið:

„Þetta yrði miðstöð fyrir þessar óhefðbundnu kvikmyndir og ég tel að það sé alveg mögulegur rekstargrundvöllur fyrir slíkri kvikmyndamiðstöð. Þarna væri hægt að sýna gamlar íslenskar myndir, kvikmyndasögulegar myndir og svo þessar evrópsku myndir sem fá ekki alltaf brautargengi í hinum venjulegu kvikmyndahúsum. Þarna væri líka kominn kjörinn vettvangur fyrir kvikmyndahátíðir.“